Deu 18 | NdeIBE | STEP | AbaPhristi, bona kungabaLevi – ngempela isizwana sonke sabaLevi – mabangabi lesabelo loba ilifa ndawonye labako-Israyeli. Bazaphila ngeminikelo enikelwa kuJehova ngomlilo, ngoba leli yilo ilifa labo.

Deuteronomy 18

Iminikelo yabaPhristi labaLevi

1 AbaPhristi, bona kungabaLevi – ngempela isizwana sonke sabaLevi – mabangabi lesabelo loba ilifa ndawonye labako-Israyeli. Bazaphila ngeminikelo enikelwa kuJehova ngomlilo, ngoba leli yilo ilifa labo.

2 Abayikuba lelifa phakathi kwabafowabo; uJehova uyilifa labo, njengokuthembisa kwakhe.

3 Le yiyo ingxenye yabaphristi ezavela emihlatshelweni yabantu eyenkunzi loba eyemvu: umkhono, imihlathi yomibili kanye lezangaphakathi. 4 Lifanele libaphe izithelo zakuqala zamabele enu, iwayini elitsha lamafutha, uboya bakuqala ekugundweni kwezimvu zenu, 5 ngoba uJehova uNkulunkulu wenu ubakhethile bona kanye lezizukulwane zabo phakathi kwazo zonke izizwana zenu ukuze kube yibo abazakwenza umsebenzi wokukhonza ebizweni likaJehova ngezikhathi zonke. 6 Nxa umLevi angasuka kwelinye lamadolobho enu loba kungaphi kwelaba-Israyeli lapho abehlala khona, abeseziletha ngokuzimisela endaweni ezakhethwa nguJehova, 7 angenza umsebenzi wokukhonza ebizweni likaJehova uNkulunkulu wakhe njengabo bonke abafowabo abangabaLevi abasebenzela khonapho phambi kukaJehova.

8 Uzakwabelana labanye bakhe ngokulinganayo kulokho abakuzuzayo, lanxa yena esezuze imali ekuthengisweni kwempahla yakwabo.

Izenzo ezinengekayo

9 Lapho selingena elizweni uJehova uNkulunkulu wenu alinika lona, lingabozifundisa ukulingisa izenzo ezinengekayo zezinye izizwe khonale. 10 Akungabi lamuntu phakathi kwenu ozakwenza umhlatshelo ngendodana yakhe loba indodakazi yakhe ngomlilo, kangabi yisanuse loba ocasisa ngemibono ocasisa imilingo njalo ophathelene lobuthakathi,

11 ophosayo, loba olamadlozi loba olemimoya loba okhangelele kwabafileyo. 12 Loba ngubani owenza lezizinto uyisinengiso kuJehova, kanti njalo ngenxa yezenzo lezi ezinengekayo uJehova uNkulunkulu wenu azazixotsha phambi kwenu lezizizwe. 13 Kumele libemsulwa phambi kukaJehova uNkulunkulu wenu.

Umphrofethi

14 Izizwe elizazithathela ilizwe zilalela okwalabo abathakathayo labavumisayo. Kodwa lina, uJehova uNkulunkulu wenu kalivumeli ukukwenza lokho. 15 UJehova uNkulunkulu wenu uzalivusela umphrofethi phakathi kwabafowenu njengami. Libomlalela. 16 Lokhu yikho elakucela kuJehova uNkulunkulu wenu eHorebi mhla wosuku lokuhlangana lapho elathi, “Asingalizwa ilizwi likaJehova uNkulunkulu wethu njalo singaboni umlilo omkhulu futhi, ngoba singafa.”

17 UJehova wathi kimi: “Lokho abakutshoyo kuhle. 18 Ngizabavezela umphrofethi onjengawe phakathi kwabafowabo; ngizamfunza amazwi ami, yena nguye ozabatshela konke engizamlaya ngakho. 19 Nxa loba ngubani ongayikulalela amazwi ami azakhulunywa ngumphrofethi ngebizo lami, mina ngokwami yimi engizamelana laye.

20 Kodwa-ke umphrofethi ozenza okhuluma amazwi ami wona kungesiwo engimlaye ngawo ukuba awatsho, loba umphrofethi okhuluma ngebizo labanye onkulunkulu, kumele abulawe.”

21 Lingazitshela lokhu lithi, “Singakwazi njani ukuthi lelilizwi kaliveli kuJehova na?” 22 Nxa lokho okumenyezelwa ngumphrofethi ngebizo likaJehova kungenzakali loba kugcwaliseke, lokho kuyilizwi eliyabe lingaveli kuJehova. Lowo mphrofethi uyabe ekhuluma ize. Lingamesabi.